Kulturbudsjettet aukar med 1,2 milliardar kroner

Satsing på lokal og regional kultur

• Regjeringa foreslår å gi tilskot til 16 nye prosjekter under ordninga for nasjonale kulturbygg, med samla tilsegn som statleg medverknad på over 621 millionar kroner. Byggeprosjekta er lokalisert i alle deler av landet.
• Regjeringa foreslår å etablere ei ny ordning for regionale kulturfond, med ei løyving på 75 millionar kroner. Dette skal gi fylkeskommunane meir musklar til å støtte lokalt og regionalt kulturliv. Dette er ei ny satsing som vil styrke kulturtilbodet i heile landet.
• Regjeringa vil ivareta kulturinstitusjonane, og foreslår meir pengar til drift av fleire musikk- og scenekunstinstitusjonar og museum. Samla tilrår regjeringa 82,3 millionar kroner til ulike kulturinstitusjonar over heile landet, slik at dei kan halde fram med å utvikle gode tilbod for sitt publikum.
• Regjeringa vil styrke arbeidet med å digitalisere kulturarven, og foreslår å auke løyvingane til Nasjonalbiblioteket i Mo i Rana og Norsk helsearkiv på Tynset med 20 millionar kroner til kvar.
• Regjeringa vil ivareta norsk og samisk språk og kultur, og foreslår 40 millionar kroner til språkmodellar for utvikling av kunstig intelligens.
• Det samiske museet RiddoDuottarMuseat i Karasjok forvaltar ei betydeleg samisk kunstsamling og har behov for nye lokale for å kunne vise den fram for publikum. Regjeringa vil sette av 10 millionar til forprosjektet for nytt museumsbygg.

Auka deltaking blant barn og unge

• Regjeringa vil løyve 55 millionar kroner til auka deltaking i kultur- og fritidsaktivitetar for barn og unge. Midlane skal gå til fritidsklubbar, korps, leselyst, dataspel og teater. 
• Regjeringa vil legge til rette for full momskompensasjon for frivilligheit og idrett, og foreslår å auke løyvingane til momsordningane med 210 millionar kroner. 
• Regjeringa vil styrke leselysta blant barn og unge, og foreslår 20 millionar kroner over statsbudsjettet for å følgje opp tiltak i regjeringas leselyststrategi.
• Regjeringa vil forsterke innsatsen for førebygging av ekstremisme, og foreslår å auke løyvingane med 15 millionar kroner for å følgje opp anbefalingane frå Ekstremismekommisjonen.

– I ei utrygg tid treng vi investere meir i kunst og kultur, for behova er store. Det er krevjande tider med tøffe prioriteringar, og eg er glad for at regjeringa har valt å prioritere kunst og kultur, seier kultur- og likestillingsminister Lubna Jaffery.